ЕРЛІК – ЕРДІҢ ЕНШІСІ
Қазіргі мына мың құбылып тұрған заманда, біздің, яғни аулалық клубтардың атқаратын жұмыстары жан-жақты жүргізілу керек. Біздің алға қойған нақты мақсатымыз – ауыл жастарын, жасөспірімдерді, оқушыларды жақсы жолға жетелу. Отанын, елін, тілін сүйетін патриот ұрпақ өсіріп тәрбиелеу, бос уақыттарын көше кезіп, жамандыққа үйір болмай, тиімді пайдалана білуге тәрбиелеу. Сол мақсатта Байсерке ауылындағы «Жас толқын» жасөспірімдер мен балалар клубы тағы бір игілікті шара өткізді. 15 ақпан – ауған соғыс ардагерлері күніне орай «Ерлік – ердің еншісі» атты дөңгелек үстел ұйымдастырылды. Ондағы мақсатымыз балаларды Отансүйгіштікке, өзінің туып-өскен жерін құрметтеуге, үлкен-кішіні сыйлауға, адамгершілікке тәрбиелеу. Ауған соғысына қатысып, өзінің интернационалдық борышын өтеу үстінде біраз ерлеріміз жау қолынан қаза тауып, мәйіт болса, елге аман-есен оралған азаматтарымыз тәуелсіз ел игілігін еселеу жолында еселенген жігермен еңбек етіп ортамызда жүр. Сол азаматтарды құрметтеп, мақтан тұту, жас ұрпаққа үлгі ету біздің басты міндетіміз.

Кездесу кешіне ауыл ардагерлерінің төрағасы Әшім ата Жанпейісов, ақсақалдар алқасының мүшесі Кенжебай ата Есетов, ауған соғысы ардагерлерінің аудан бойынша төрағасы Жалтыров Берікбол аға, округ ардагерлерінің төрағасы Байзақашев Рүстембек ағамыз және әкімшіліктен Сания Жапарханқызы шақырылды. Шара барысында тарихқа шегініс жасап, ауған соғысы, оның жай-жапсары туралы кіріспе сөзден кейін ардагерлерге сөз беріліп, аға ұрпақ өкілдері ауған соғысы туралы бастан өткізген оқиғаларын, көріп-білгендерін қысқаша баяндап берді. Оқушылардың қойған сұрақтары да өте әсерлі болды. Оның ішінде әсіресе, сол бір сұрапыл күндері елге, ата-анаға, бауырға, қарындасқа деген сезіміңіз, сағынышыңыз жайлы айтып берсеңіз» деген өтінішке ардагерлер көздеріне жас ала жауап берді. Одан кейін шақырылған қонақтарымызға дайындаған кішігірім концерттік бағдарламамызды тарту еттік. Онда 8-сынып оқушысы Асқар Айдос пен 5-сынып оқушысы Қыдырбаева Салтанат «Арынғазы», «Тепен көк» күйін нақышына келтіріп орындап берсе, №12 мектептің ән сабағының мұғалімі Құмарбаев Еділ ағамыз «Жас дәурен», «Елім менің», «Достарым», «Біздің елдің жігіттері» деген жақсы таңдаулы әндерін тарту етті.

Соңында аулалық клубта қолөнер үйрімесінің жетекшісі, оқушылармен бірге отырып тіккен кішкене жастықшаларын сыйға берді. Барлық қонақтарымыз өздерінің «Жас толқын» жасөспірімдер мен балалар клубына деген ізгі тілектерін білдіріп, рахметтерін айтып, алдағы күнде клубтың кеңейіп, өсіп-өне беруіне тілектес екендерін білдіріп, жақсы көңіл күймен, ерекше әсермен тарқасты.