АУЫЛ ЖАСТАРЫН ЖҰМЫЛДЫРАЙЫҚ

«Спорт – денсаулық кепілі» деген нақыл сөз бекер айтылмаған болар.
Ауыл жастарын салауатты өмір салтын сақтауға, спортпен айналысуға шақыратын іс-шаралар Чапаев ауылында ерекше қолға алынған. Спорттың көптеген түрін меңгерген ауыл жастарынан құралған, «Арман», «Сарыбұлақ», «Азамат» футбол командалары аудан көлемінде жеңімпаз атанып жүрсе, бокстан Республикалық сайыстарда аудан намысын қорғап жүрген жастарымыз – Наталья Тарасенко (Қазақстанның 2 дүркін чемпионы), Айгерім Адиева (Қазақстанның жүлдегері), сондай -ақ, Ләйлә Абдинова, Икрам Ибрагимов, Алмат Ордабаев сияқты жастарымыз облыстық, аудандық сайыстардың жеңімпазы боп жүрген мақтан тұтар спортшылары. Әрине, осындай жетістіктерге жеткізіп жүрген жаттықтырушысы СССР-дің спорт шебері Әли Нәдірұлы Әлиевтің қажырлы еңбегінің арқасы екені сөзсіз.

Сондай-ақ, жастар мен жасөспірімдердің дене шынықтырумен тұрақты айналысып жүрген жаттығу залы да үздіксіз жұмыс істейді.

Алматы облысының туризм, дене шынықтыру және спорт басқармасының 14-15 тамыз күндерін «Спорт күні» ретінде өткізуге байланысты аудандық спорт және дене тәрбиесі бөлімінің жоспарына сәйкес спорттық шаралар өткізу Чапаев ауылында да ауыл әкімі Д.Қоңырбаевтың бекітуімен алдын ала жоспарланды. Бұл іс-шаралар Мәдениет үйінің алдында, спорт алаңдарында ұйымдастырылды. «Балауса» балалар мен жасөспірімдер клубының ұйымдастыруымен «Арқан тартыс», «Көңілді старт» сайыстары, жүгіру жарысы (кросс) өткізіліп, футбол ойынын №10 орта мектептің мұғалімі А.В.Бредихин жергілікті командалармен өткізді. Ә.Н.Әлиев ұйымдастырған бокс сайысы да жастардың қошеметіне бөленген қызықты ойын болды.

Спорт күнін атап өтуге қатысып, жеңімпаз атанғандар жергілікті әкімнің мақтау қағаздарымен марапатталды.