ӨНЕР КӨГІНДЕГІ ҚОС ҚАРЛЫҒАШ

Мәдениет-халықтың ең үлкен рухани азығы десек,адамзат баласының ақыл-ойы, маңдай тері, қажырлы еңбегінің, дәл сонымен қатар дарынының арқасында оның өнері де өрісін кеңейтіп, тума талаптарын даралауы – өмір талабы. Осы орайда Елбасы Н.Назарбаевтың «Еліміздің болашағы – бүгінгі жастардың қолында», деген айқындамасы бар.

Бүгінде ауданымыздың мәдениеті көркейіп, жастардың шығармашылығы дамуда. Дарынды жастарымыз айтулы халықаралық байқаулар мен фестивальдарға қатысып, жемісті оралуда. Әрбір жастың бойында шығармашылықтың кереметтей қайнар бұлағы жатыр.Жерлестеріміз ел өркениетін дамытуға бағытталған өткір де өзекті жобаларын жүзеге асыру жолында әрдайым биіктен көрінуімен аудан мерейін үстем етуде.
Солардың қатарын аудан орталығы Өтеген батыр кентіндегі халқымыздың ақиық ақыны Мұқағали Мақатаев атындағы орта мектептің өрімтал өнер жұлдыздары толықтыруда. Мысалы, мектептің 6-сынып оқушысы, Меруерт Қасымбек «Жаралы сезім», «Жетімдер» фильміне түсіп үлгерген балауса өнер жұлдызы.
Өнердің кез келген саласының идеология майданында атқаратын ролі зор десек, соның ішінде кино өнері тез дамуда. Кино өнері-әдебиет пен театрдың бейнелеуі, музыкалық көркемдік қасиеттерін, эстетикалық заңдары мен шығармашы-лық дәс-түрлеуі бар дара өмір. Олай болса, өздеріңізге белгілі әуесқой режиссер Еркін Рақышев «Жаралы сезім», «Жетімдер» , «Мәңгі өмір сүрсем» фильмімен халыққа таныс. Сол фильмдерге кәсіби мамандар тарапынан қанша сын айтылса да, қарапайым халық көзіне жас алып отырып көреді.

Өмір деген кейде кездейсоқтықтан тұрады емес пе. Меруерт киноға түсемін деп те ойламаған. Ата-анасы кішкентай ғана қыздарын аяқ астынан актриса болып шыға келеді деп тіптен де күтпеген. Сөйтсе де Меруерт «Жаралы сезімдегі» Айтоша, «Жетімдер» фильміндегі Аружан бейнесін барынша шынайылықпен сомдады. Болашағынан мол үміт күттіретін Мерует мектептегі қабілетті оқушылардың бірі. «Өнерліге – өріс кең» дегендей, «Наз» бишілер тобының бишісі, мектептегі мәнерлеп оқу байқауларына белсене қатысатын балауса қыздың әнге де бейімі басым.

«Өнерлі өрге жүзеді» -дейді дана халқымыз. Бұл сөз бейне бір Жанелге қаратылып айтылған ба дерсің. №13 мектептің түлегі Жанел Халықаралық «Ақкөгершін» байқауының лауреаты, Мәскеу қаласында өткен Халықаралық «Ашық Еуропа»байқауының 2-орын иегері, Республикалық «Шабыт» фестивалінің, облыстық патриоттық әндер, Германияда өткен «Маржанды Берлин» байқауының дипломанты.

Қаршадайынан мектеп қабырғасында жүріп тамылжата ән салған ол, Ержан есімді саз өнері маманының әрі мектептегі өнерлі өрендердің жетекшісі болып жүрген әкесінің ерке қызы. Арада жылдар өтіп, уақыт алға жылжыған сайын өнер атты киелі ұғымның мәні мен мағынасына терең бойлап,үнемі талпыныспен келеді.

Жеке тұлғаның қабілетінің жан-жақты ашылуына, болашақ кәсібін дұрыс таңдауына ұстаз ізденісің де үлкен ықпалы зор екені даусыз. Осы орайда Меруерттің, Жанелдің сонымен қатар да басқа да талантты ұл-қыздардың өнерінің жарқырай ашылуына аудан әкімі Н.Логутовтың тікелей қолдауымен, белгілі сазгер В.Питерцевтің көркемдік жетекшілігімен ұйымдастырылған ауданымыздың жас өнерпаздарынан құралған «Іле сазы» ансамблінің тигізген әсері де мол болды.

Біз бүгін ауданымыздың даңқын аспандатып, өнер көгінде самғаған Жанел мен Меруерт сынды қос қарлығашымызды мақтан тұтамыз.