Бір мектептен үш хабар
Мұқағали Мақатаевтың
туғанына – 80 жыл

Қарасаздың қыран ұлы, жампоз жырдың дүлдүлі, ақиық ақын Мұқағали Мақатаев қазақтың қара өлеңін ой мен сезімге байытып, оның құдіреттілігін таныта білді. Ақық жыр болып ақтарылған ақиық ақын өлеңдерін үлкен де, кіші де сүйсіне оқиды, тамсана оқиды, таңырқай оқиды. Биыл жыр дүлдүлінің туғанына 80 жыл толып отыр. Осы мерейтойға байланысты №9 орта мектепте «Осы мен өлмейтін, өлмейтін шығармын, Сәл ғана мызғып ап қайтадан тұрармын» атты апталық болып өтті. Бұл шараға ұстаздар мен оқушылар жаппай атсалысты. Атап айтатын болсақ, қазақ тілі мен әдебиеті пәнінің мұғалімі Б.Т.Казимова «Туады, туады әлі нағыз ақын, Нағыз ақын бал мен у тамызатын» атты 5-11 сыныптар арасында мәнерлеп оқу сайысын өткізді. Байқауға 50-ден астам оқушы қатысып, ерекше көзге түскендері жүлделі орынға ие болып, 11 Ә, 10 Ә, 9 А, 9 В, 5 А,Ә, 7 А сынып оқушылары мақтау қағаздарымен марапатталды. Ж.С.Садықтың ұйымдастыруымен 9 Ә сыныбында «Қазақ поэзиясының Хантәңірі» атты тәрбие сағаты болып өтті. Тәрбие сағатында ақынның өлеңдері оқылып, әндері шырқалып, «Аққулар ұйықтағанда» поэмасынан сахналық көрініс қойылды. А.Валибаева 7 А сыныбында «Мұқағали-поэзия патшасы» атты тәрбие сағатын өткізді. 2 Ә сыныбында Г.Қаупынбаеваның ұйымдастыруымен «Мен өмірді жырлау үшін келгенмін» атты тәрбие сағаты болып өтті. Ән-күй пәнінің мұғалімдері Д.Нақысбекова мен Д.Қайымбасовтар «Ей, өлең, маған тиген еншім едің, Бой жазайын, қасыма келші менің» атты Мұқағали әндерінен концерт ұйымдастырып, мектепті әнмен әрлендірді. Бастауыш сынып мұғалімі А.А.Шалқаева «Мұқағали мәңгілік ғұмыр» атты облыс көлемінде мектепішілік поэзиялық кеш ұйымдастырды. Бұл кешке арнайы қонақтар шақырылды. Осындай іс-шаралар оқушылардың өткені мен бүгінгісін таразылай отырып, ұлылар ұлағатына зер салып, тәрбиелі де білімді азамат болатынына ықпал ететіні сөзсіз. Мұқағали поэзиясы әрбір мезгілмен бірге, әр ұрпақмен бірге мәңгілік жасай бермек.