ТІЛ МЕН ТАРИХ – ҰЛТ БАЙЛЫҒЫ

«Тілдің мерейі – елдің мерейі» – демекші, әр мектепте тілді қастерлеуді, құрметтеуді бірінші орынға қойған ұстаздар қауымының ішінде қазақ тілі мен тарих пәні мұғалімдерінің алар орны ерекше. Соның бір дәлелі жақында біздің №5 орта мектепте өткен қазақ тілі мен тарих пәні бірлестіктерінің онкүндігі. Онкүндікте атқарылған іс-шаралар ауқымы өте мазмұнды, мәнді болуына әдістемелік бірлестік жетекшісі, жоғары санатты ардагер ұстаз К.Молдабекованың қосқан үлесі ерекше екенін айтып өтпеске болмас. Ол кісінің қазақтың ақиық, біртуар ақыны М.Мақатаевтың «Аққулар ұйықтағанда» поэмасы бойынша өткізген конференция сабағы, «ХХІ ғасырдың салауатты азаматы» атты ойын сабағы, «Етістіктің ерендері» грамматика сабағы өте тартымды да, қызықты өтіп, оқушылар мен ұстаздардың қызығушылығын туғыза білді.

«Ұлтыңды сүйсең – Баукеңше сүй!» тақырыбында тарих пәнінің жоғарғы санатты мұғалімі А.Тұрманбетовтың ұйымдастырған дөңгелек үстелі де бәрімізді елең еткізген жаңалық болды. «Ел болашағы-білімді ұрпақ» деген қанатты сөзді әрдайым алға ұстаған ұстаз үмітін 9-сынып оқушылары жаңа бір қырынан дәлелдей түскендей. Оқушылар өздерінің шығармашылық жұмыстарын ортаға салғанда, арамызда ақын, жазушы, ғалымдар отырғандай сезімде болдық. Ал «XX ғасырдың басындағы қазақ мәдениеті» атты ашық сабақтан ұстаздар қауымы өздері үшін көптеген қызықты, жаңа ашылымдарды таба білді.
«Абай – қазақтың кемеңгер ақыны» атты Г.Тұрманбетова өткізген ашық сабақта өз деңгейінде өтіп, ұлы Абайды жаңа бір қырынан танытты десем, қателеспеген болар едім. «Мақал – сөздің мәйегі» атты сайыс арқылы оқушылардың рухани азығы баии түссе, бастауыш орыс сыныптарында сабақ беріп жүрген жас ұстаз А.Мырзалиева мен еңбек жолын жаңадан бастаған Жазира Молдабекованың сыныптан тыс сабақтары да көңілден шығып, оқушылардың пәнге, тілге деген қызығушылын оята білді.

Мектеп ішіне ілінген үнқағаздар, қабырға газеттері, оқушылардың қолынан шыққан әр түрлі сөзжұмбақ, ребустар, сурет көрмесі, т.б., онкүндіктің шырайын кіргізе түсті. Онкүндік кезіңде тек оқушылар ғана емес ұстаздар да өз өнерлерін ортаға салып, жаңа бір қырынан көріне білді. Онкүндіктің жабылу қарсаңы Хантәңірінің мұзбалақ ақыны Мұқағали Мақатаевтың мерейтойын мерекелеуге арналған кешке ұласты. Оқушылар ақын аталарына арнаған жүрекжарды жырларын шабыттана оқыса, ақын сөзіне жазылған әндерді А.Тоқымбаева, Ш.Райымбекова, С.Билибаева, Ж.Молдабекова сынды ұстаздар нәшіне келтіре орындап, көпшіліктің ризашылығына бөленді. Оқушылар арасынан ерекше көзге түскен Ж.Ауазов, А.Бекмұқамет, Ж.Сатекова, Ж.Құттықбай, С.Мендіғали, А.Тұрманбетова т.б. жас таланттар көрермен көзайымы бола білді. Мектептің кино залында арнайы слайдтар көрсетіліп, ақын өмірінен мол мағлұмат берілсе, 7-сынып оқушылары сахнада нағыз әртістерше өз өнерлерін көрсете білді.
Жалпы алғанда, осы онкүндікте халықтық салт-дәстүрді, әдет-ғұрыпты қастерлеп, құрметтеуді, өз жұртының мол мұрасын, әдебиеті мен тілін, ұлттық ерекшеліктерін білу, бағалау басты мақсат екендігі оқушыларға кеңінен түсіндірілді.